Մեծ ուրախութեամբ կը յայտնենք, որ Իրաքահայ համայնքի մտաւորական, բանաստեղծ եւ մայրենի լեզուի ուսուցիչ Արամ սրկ. Քեթենճեանը տարւոյս Օգոստոսին արժանացաւ ըլլալու «Համահայկական Գրողների Միութեան» անդամ։ Յիշելու ենք որ Պր. Քէթէնճեանը հեղինակն է՝  բանաստեղծութիւններու չորս գիրքերու։ 2010ին ան անդամակցած է «Հայ Գրողներու Միաւորման»։ Եղած է Առաջնորդարանիս «Կանթեղ» եռամսեայ պաշտօնաթերթի խմբագրական կազմի անդամ, ինչպէս նաեւ Ազգային Տարրական Երկսեռ Վարժարանի «Մաշտոց» տարեգիրքի գլխաւոր խմբագիր։ Այս առիթով կը շնորհաւորենք զինք, մաղթելով քաջառողջութիւն եւ գրական մարզին մէջ նորանոր յաջողութիւններ։ Ստորեւ նմոյշ մը իր բանաստեղծութիւններէն, որը  նուիրուած է Պաղտատի Սբ. Գրիգոր Լուսաւորիչ Առաջնորդանիստ եկեղեցւոյ 60 ամեակին։

Եկեղեցին Մեր

Պաղտատի սրտին կառոյց գեղանի,

Եկեղեցին մեր վաթսո՜ւն տարեկան.

Բուրմունքներուն մէջ զուլալ Տիգրիսի,

Երկնաբե՜րձ փարոս, ջահ նուիրական:

Գմբէթներն անոր, փա՛ռք են, վեհութի՜ւն.

Զանգակատունը՝ կա՛նչ լինելութեան.

Իր դասը խորունկ՝ հոգւոց մաքրութիւն.

Կամարները վեհ՝ դրոշմ հայկական:

Օծեալ խաչերով, սրբապատկերով,

Արեւելք ուղղուած խորանը լուսոյ՝

Խորհուրդ է խորին, սիրոյ անհո՜ւն ծով

Ու յաւիտեանըս՝ գահն է Աստուծոյ…

Խունկն անուշահոտ՝ առաքինութիւն.

Մոմերը վառած՝ ճշմարտութեան լո՜յս.

Աղօթքն երկնասլաց՝ կեանք է, փրկութիւն.

Եկեղեցին մեր, հաւատք է եւ յո՛յս…