Հետեւեալ հաղորդագրութիւնը ստացանք Իրաքի Հայ Տիկնանց Մշակութային Միութեան Վարչութեան կողմէ, որը կ՛արտատպենք նոյնութեամբ (Խմբ.)
Ուրբաթ 8- Մարտ 2019 երեկոյեան ժամը 6:30-ին, հովանաւորութեամբ Թեմիս Բարեխնամ Առաջնորդ Գերաշնորհ Տ. Աւագ Արքեպիսկոպոս Ասատուրեանի և Իրաքի Ազգային Կեդրոնական Վարչութեան, Իրաքի Հայ Տիկնանց Մշակութային Միութիւնը Պաղտատի Հայ Երկսեռ Երիտասարդաց Միութեան սրահին մէջ «ՕՊԵՐԵՏ» մը կազմակերպեց նուիրուած Երեւանի հիմնադրման 2800 ամեակին, Միջազգային Բեմադրիչ Պրն. Արա Եսայեանի ղեկավարութեամբ: Միջոցառման ներկայ էր ՀՀ Արտակարգ և Լիազոր դեսպան Պրն. Հրաչեա Փոլատեանը իր տիկնոջ հետ, ինչպէս նաեւ ներկայ գտնուեցան օտար հիւրեր և հոծ բազմութիւն: Տիկնանց Միութեան փոխ-ատենապետուհի Տիկ. Նուշիկ Մելքոնեանը բացման խօսքով բարի գալուստ մաղթեց ներկաներուն, ապա շնորհաւորեց մայրերուն, քոյրերուն և աղջիկներուն, Մարտ 8-ի` Կանանց Միջազգային Տօնի կապակցութեամբ: Վարչութեան խօսքը արաբերէն լեզւով կարդաց Տիկ. Արփինէ Թեճոեանը: Անդրադառնալով Երեւանի հիմնադրման 2800 ամեակի մասին Տիկին Նուշիկ Մելքոնեանը նշեց որ աշխարհի մէջ քիչ հնագոյն քաղաքներ կան որոնք ունին իրենց յստակ թուագրուած հիմնադրման վկայականը կամ արձանագրութիւնը. անոնցմէ մէկը Հայոց աշխարհի տասներկրորդ մեր այսօրուայ մայրաքաղաք Երեւանն է, որը հիմնադրուած է նոյնիսկ Հռոմ քաղաքէն առաջ: Երևան քաղաքի պատմութեան սկիզբ ընդունուած է Ն.Ք. 782 թուականը երբ Ուրարտական թագաւոր Արգիշտի Ա-ը քարի վրայ սեպագիր արձանագրութեամբ հիմնադրեր և ի պահ է տուեր Էրեբունի-Երևան քաղաք-ամրոցի կառուցման վկայութիւնը: Էրեբունի հիմնադրման տարեթիւը ստոյգ հայտնի է մեզ հասած Արգիշտի թագաւորի սեպագիր արձանագրութունէն: Հարկ է նշել որ ձեռնարկը, որու ընթացքին մէջ ներկայացուեցան պարեր ու կենդանի պատկերներ, ամբողջական աշխատանք մըն էր որը կը ներկայացներ Հայաստանի պատմութիւնէն առնուած կարեւոր դեպքեր եւ անձնաւորութիւններ:
Ի.Հ.Տ.Մ.Մ. Վարչութիւն
