ԹՂԹԱԿՑՈՒԹԻՒՆ

ՀԱՆԴԻՍԱՒՈՐ ՍՈՒՐԲ ՊԱՏԱՐԱԳ ՊՐՊԱՆՔԻ ՍՐԲՈՑ ՂԵՒՈՆԴԵԱՆՑ ՄԱՅՐ  ՏԱՃԱՐԻՆ ՄԷՋ

Ընդառաջելով ԱՄՆ-ի Արևմտեան Թեմի Բարեխնամ Առաջնորդ Գերշ. Տ. Յովնան Արք. Տէրտէրեանի հրաւէրին, Իրաքահայ Թեմի բարեջան Առաջնորդ Գերշ. Տ. Օշական Եպս. Կիւլկիւլեանը, Կիրակի 3 Նոյմ. 2024ին պատարագ մատուցեց և յաւուր պատշաճի քարոզեց Պրպանքի Սրբոց Ղեւոնդեանց Մայր Տաճարին մէջ։

Յընթացս Սուրբ  Պատարագին, գլխաւորութեամբ  Յովնան Սրբազանի և  մասնակցութեամբ  Տ. Վարդան Եպս. Նաւասարդեանի  նաեւ Օշական Սրբազանի կատարուեցաւ Հայրապետական մաղթանք նուիրուած  Գարեգին Բ Ամենայն Հայոց  Կաթողիկոսի  Գահակալութեան 25րդ տարեդարձին,  ինչպէս նաև աղօթք`  Ատրպէյճանի մէջ ապօրինաբար բանտարկուած հայ զինուորներուն համար։

Օրուան քարոզը սկսելէ առաջ,  Օշական Սրբազանը երախտիքի խօսք յայտնեց Յովնան Արքեպիսկոպոսին և Թեմական Հոգաբարձութեան, այս փառահեղ տաճարի  Սբ. Խորանին վրայ պատարագ մատուցելու առիթն ընծայելու։

Իր քարոզին որպէս  բնաբան` Նորին Սրբազնութիւնը ընտրեց օրուայ Աւետարանը <<…Դուք էք իմ մայրս և եղբայրներս։>> Ղուկաս Ը։19

Այդ մասին պատգամելէ ետք  Սրբազան Հայրը բարեպաշտ հաւատացեալներուն ներկայացուց  Իրաքահայ Թեմի հիմնադրութեան հետաքրքրական պատմութիւնը։

Յաւարտ Սբ Պատարագին հոգեհանգստեան պաշտօն կատարուեցաւ Արեւմտեան Ամերիկայի ՀՄԸՄ-Ի  ննջեցեալներու հոգւոց խաղաղութեան համար։ Այդ առիթով ներկայ եղան Խումբ մը գայլիկներ, սկաուտներ և այլն…։

Սբ. պատարագին իր մասնակցութիւնը բերաւ հոգշ. Տ. Երեմեա Վրդ. Աբգարեանը, արժանապատիւ քահանայ հայրեր  և բարեպաշտ հաւատացեալներու հոծ բազմութիւն։

Յատկանշական է  որ  Ս պատարագէն ետք Սրբազան Հայրը հանդիպում ունեցաւ ԱՄՆ հաստատուած խումբ մը  Իրաքահայերու և բացատրութիւններ տուաւ անոնց հետաքրքրող հարցերուն։

Արամ սրկ. Քէթէնճեան

4 Նոյեմբեր, 2024