Իրաքահայ Թեմէն ներս պաշտօնավարելու նպատակով՝ 2022 թուականի Յուլիսի 23ին, Մայր Աթոռ Սբ. Էջմիածնէն Պաղտատ ժամանեցին հոգշ. Տ. Ղեւոնդ աբղյ. Սաղաթելեանը եւ արժ. Տ. Ադամ քհնյ. Մովսէսեանը: «Վազգէն Ա.» հոգեւորականաց բնակարանին մէջ զանոնք ընդունեց ու բարի գալուստ մաղթեց Թեմիս առաջնորդ՝ հոգշ. Տ. Օշական վրդ. Կիւկիւլեանը: Յաջորդ առաւօտ, Քրիստոսի Պայծառակերպութեան Տօնին առիթով, Սբ. Կարապետ Վանքին մէջ իր անդրանիկ պատարագը մատուցեց Տ. Ադամ քահանան: Պատարագը, որուն ներկայ եղաւ Իրաքի Հայոց նախկին առաջնորդ՝ գեր. Տ. Աւագ արք. Ասատուրեան, հանդիսապետեց ու յաւուր պատշաճի քարոզեց Թեմիս առաջնորդ՝ հոգշ. Տ. Օշական վարդապետը: Ան՝ կրկին անգամ բարի գալուստ մաղթեց երկու հոգեւորականներուն, զանոնք ծանօթացուց ներկայ հաւատացեալներուն ու մաղթեց յաջողութիւն իրենց առաքելութեան մէջ: Յետ պատարագին՝ առաջնորդ վարդապետը լուսանկարուեցաւ թեմի հոգեւորականց դասին հետ: Երեկոյեան, «Մելինէ Դանիէլ Իսքէնտէր» Ազգային Ծերանոցի դահլիճին մէջ բարեջան առաջնորդը յատուկ հանդիպում ունեցաւ Ռեճինէ Կարապետ Աղեքսանդրեան Վագըֆի աւանդապահ Մարմինի անդամներուն հետ: Ներկայ էր նախկին առաջնորդ՝ Տ. Աւաք արք. Ասատուրեանը նաեւ նոր ժամանած քահանայ հայրերը: Մտերմիկ մթնոլորտի մէջ, տեղի ունեցաւ կարծիքներու փոխանակում եւ սիրոյ ճաշ: Յաջորդ առաւօտ, Յուլիսի 25ին առաջնորդարանին տուած այցելութեան ընթացքին, Հայաստանէն ժամանած հոգեւորականները ծանօթացան Առաջնորդարանի զանազան կառոյցներուն: Անոնց ուղեկցեց Արամ սրկ. Քէթէնճեանը որն տեղեկութիւններ տուաւ Սբ. Գրիգոր Լուսաւորիչ մայր եկեղեցւոյ շինարարութեան եւ պատմութեան, նաեւ թանգարանի, գրադարանի եւ այլ բաժիններու հիմնադրութեան մասին. զանոնք ծանօթացուց առաջնորդարանի պաշտօնէութեան, ներկայացնելով իւրաքանչիւրին կատարած գնահատելի աշխատանքը:

Print Friendly, PDF & Email

կիսուիլ

Like this:

Like Loading...
%d bloggers like this: