Հետեւեալ հաղորդագրութիւնը ստացանք Թեմի հայ դատի յանձնախմբէն, զոր կը հրապարակենք նոյնութեամբ։
Առաջնորդարանի տեղկ. հմկրգ.
<<Կազմակերպութեամբ Իրաքի Հայ Դատի Յանձնախումբին տեղի ունեցաւ գրական-գեղարուեստական երեկոյ նուիրուած Հայոց Ցեղասպանութեան 108-րդ ամեակին: Միջոցառման ներկայ էին՝ Իրաքի Հայոց Թեմի Առաջնորդ Հոգեշնորհ Տ. Օշական Վրդ. Կիւլկիւլեան, Թեմիս նախկին Առաջնորդ Գերաշնորհ Տ. Աւագ Արք. Ասատուրեան, Կաթողիկէ Հայ Համայնքի Առաջնորդ Տ. Ներսէս Ծրգ. Վրդ. Զապարեան, ՀՀ Դեսպանութեան գործերու ժամանակաւոր հաւատարմատար Պրն. Ալիկ Ղարիպեան, Տ. Գէորգ Քհնյ. Արշակեան, Ազգային Կեդրոնական վարչութեան ատենապետ և անդամք, Պաղտատի մէջ գործող Հայ միութենական հաստատութիւններու ներկայացուցիչներ, Արաբ մտաւորականներ, խորհրդականներ, համալսարաններու դասախօսներ և հոծ բազմութիւն:
Բացման խօսքի ընթացքին որը կատարուեցաւ Հայերէն և Արաբերէն լեզուներով, անդրարարձ կատարուեցաւ Օսմանեան կայսրութեան օրով և տարիներու ընթացքին Հայերու դէմ ծրագրուած և իրականացուած ջարդերու, Հայ գաղթականներու տառապանքներու մասին, ինչպէս նաև շեշտադրում կատարուեցաւ Ատրպէյճանի վարած ռազմական քաղաքականութեան մասին որը կը վկայէ որ Արցախահայութեան դէմ նոր ցեղասպանութիւն իրականացնելու նպատակներ կան և Լաչինի «Բերձորի» փակումը անոր վառ ապացոյցն է: Խօսքի աւարտին շնորհակալութիւն յայտնուեցաւ Արաբ հիւրընկալ ժողովուրդին և կառավարութեան որոնք սիրով ընդունեցին Հայ գաղթականներուն, ինչպէս նաև յատուկ շնորհակալութիւն յայտնուեցաւ Իրաքցի Արաբ գործընկերներուն որոնք շուրջ տասը տարիէ ի վեր կը պաշտպանեն Հայ Դատը և կը ջանան Հայոց Ցեղասպանութեան ճանաչման և Արցախի ժողովուրդի ապահովութեան և ազատագրման:
Միջոցառման ընթացքին հնչեցին հայրենասիրական երգեր, ասմունքներ, ներկայացուեցաւ կենդանի պատկեր և վաւերագրական ֆիլմեր: Միջոցառման ելոյթներ ունեցան պարոնայք Սաադ Սալում և Մուհամմեդ Ուկեյլլին որոնք անդրադարձան Հայոց Ցեղասպանութեան ճանաչման կարեւորութեան մասին, նշելով որ անոր անպատժելիութիւնն ու ժխտողականութիւնը հանգեցուց տարբեր երկրներու մէջ այլ ցեղասպանութիւններու իրականացման, օրինակ ներկայացնելով 2014թ. Իրաքի Սինճար քաղաքի Եզիդի ժողովուրդին դէմ կատարուած ցեղասպանութիւնը։ Միջոցառման աւարտին և փակման խօսքի ընթացքին Թեմիս Առաջնորդը հանդէս եկաւ հայրենասիրական և ոգեշնչող ելոյթով, և ապա շնորհակալութիւն յայտնեց ներկաներուն և հատկապէս օտար հիւրերուն:>>
Իրաքի Հայ Դատի Յանձնախումբ
28-4-2023
About The Author
