Կիրակի առաւօտ, Յունուարի 29ին, հանդիսապետութեամբ Իրաքահայոց Թեմի բարեջան Առաջնորդ հոգշ. Տ. Օշական Վրդ. Կիւլկիւլեանի, Սուրբ և Անմահ Պատարագ մատուցուեցաւ Զախոյի Ս. Աստուածածին եկեղեցւոյ մէջ ։ Պատարագիչն էր Էրպիլի հոգեւոր հովիւ արժ. Տ. Արթուն քհնյ. Խալաթեանը։ Յընթացս Սուրբ Պատարագի, Տհօքի հոգեւոր հովիւ արժ. Տ. Մասիս քհնյ. Շահինեանը շրջանի Թաղականութեան, հայ հաւատացեալներու և իր անունով բարի գալուստ մաղթեց Առաջնորդ Հայր Սուրբին և հրավիրեց զայն քարոզելու և հաւատացեալ ժողովուրդին հայրական օրհնութիւնը տալու։ Օրուայ Աւետարանի համաձայն, բնաբան ունենալով <<Ես եմ, մի՜ վախնաք։>> աշակերտներուն ուղղուած Յիսուս Քրիստոսի յորդորը, Հայր Սուրբը յաւուր պատշաճի քարոզեց։ Իր խօսքին մէջ ան յորդորեց հաւատացեալներուն չվախնալ և Քրիստոսը յենարան ունենալով դիմագրաւել բոլոր դժուարութիւնները։ Յետ պատարագի և հոգեհանգստեան պաշտօնի, Առաջնորդ Հայր Սուրբը քահանայի բնակարանի դահլիճին մէջ հանդիպումներ ունեցաւ Զախոյի և շրջաններէն ժամանած Թաղականութեանց և հիւրերուն հետ, որմէ ետք այցելեց Հայոց գերեզմանատունը և հոգեհանգիստի աղօթք արտասանեց միամեայ հանգուցեալ Խաթուն Խաչատուրեան_Լազարեանի շիրիմին մօտ անոր հոգւոյ խաղաղութեան համար։ Կէսօրին, Հայր Սուրբն ու անոր ընկերացող պատուիակութիւնը ինչպէս նաեւ շրջաններու հիւրերէն ոմանք հրաւիրուեցան սիրոյ ճաշի։
